4.1 An Aidiacht Cháilíochta

4.1.1

Roinntear na haidiachtaí ina dtrí dhíochlaonadh.

4.1.2

Ní dhíochlaontar an aidiacht ach amháin nuair a úsáidtear mar aidiacht cháilíochta í.

4.1.3

Braitheann foirm aidiachta cáilíochta ar inscne, tuiseal agus uimhir an ainmfhocail atá á cháiliú léi agus ar dhíochlaonadh na haidiachta féin. Féach Caibidil 9 le haghaidh rialacha maidir le haidiachtaí a úsáid le huimhreacha.

4.2 Inscne, Tuiseal agus Uimhir na hAidiachta Cáilíochta

4.2.1

Réitíonn an aidiacht cháilíochta leis an ainmfhocal ó thaobh inscne, tuisil agus uimhreach. I gcás sraith ainmfhocal, réitíonn an aidiacht leis an ainmfhocal deiridh, e.g., mná agus fir ghnaíúla; peann, páipéar agus bileog ghorm. I gcás sraith aidiachtaí i ndiaidh ainmfhocal amháin, réitíonn gach aidiacht leis an ainmfhocal, e.g., ailt shuimiúla thábhachtacha fhada.

Tháinig na mná agus na fir ghnaíúla isteach.

Tháinig na fir agus na mná gnaíúla isteach.

Bhí sciorta, cóta agus scaif ghorm uirthi.

Tá cait mhóra fhiáine i ngairdín na n‑ainmhithe.

4.2.2

San uimhir uatha —
1. i gcás ainmfhocal firinscneach, ní shéimhítear an aidiacht atá á cháiliú, e.g., an fear beag; ag an bhfear beag; ach amháin sa tuiseal gairmeach agus sa tuiseal ginideach e.g., a fhir bhig; hata an fhir bhig;
2. má tá Córas an tSéimhithe (féach 1.7) in úsáid, séimhítear an aidiacht a cháilíonn ainmfhocal firinscneach sa tuiseal tabharthach má ghabhann an t‑alt leis an ainmfhocal sin, e.g., ag an fhear bheag.
San uimhir uatha, i gcás ainmfhocal baininscneach, séimhítear an aidiacht atá á cháiliú sna tuisil go léir, e.g., an bhean bheag; a bhean bheag; ag an mbean bheag; ach amháin sa tuiseal ginideach, e.g., hata na mná bige.

4.2.3

Tugtar léiriú i Caibidil 9 ar an aidiacht cháilíochta nuair atá uimhir roimh an ainmfhocal atá á cháiliú.

4.2.4 Séimhiú ar Aidiacht Cháilíochta san Uimhir Uatha

Fágtar aidiacht lom nó cuirtear séimhiú uirthi bunaithe ar inscne agus tuiseal an ainmfhocail atá á cháiliú léi. Léirítear na cásanna sa tábla thíos. Féach an plé ar dhíochlaonadh na haidiachta (4.3) chun eolas a fháil ar athrú foirme (seachas séimhiú) ar an aidiacht féin.

**Tábla 4A** Séimhiú ar Aidiacht Cháilíochta san Uimhir Uatha
An Tuiseal	Ainmfhocal Firinscneach Uatha	Ainmfhocal Baininscneach Uatha
Ainmneach agus Cuspóireach	gan séimhiú an fear beag	séimhiú an bhean bheag
Gairmeach	séimhiú a fhir bhig	séimhiú a bhean bheag
Tabharthach*	gan séimhiú ar an bhfear beag	séimhiú ar an mbean bheag
Ginideach	séimhiú clann an fhir bhig	gan séimhiú clann na mná bige

*Ach féach 1.7 Córas an tSéimhithe

4.2.5 Séimhiú ar Aidiacht Cháilíochta san Uimhir Iolra

San uimhir iolra, séimhítear túschonsan aidiachta má chríochnaíonn an t‑ainmfhocal iolra ar chonsan caol, mar atá sa tábla thíos (féach freisin 10.3.1).

**Tábla 4B** Séimhiú ar Aidiacht Cháilíochta san Uimhir Iolra
Séimhiú	Gan Séimhiú
Ainmfhocal dar críoch consan caol san iolra	Ainmfhocal dar críoch consan leathan nó guta san iolra
na báid fhada	na cailíní cliste
na costais shonracha	na doirse móra
na foirgnimh bhreátha	na páirceanna móra
na fir bheaga	na táilliúirí costasacha
na goirt mhóra	clanna na mban cáiliúil
na héisc gheala	clanna na bhfear beag
na húdair cháiliúla	éifeacht na bhforálacha forlíontacha
na nóiméid dheireanacha	méid na bhfuinneog cearnach
na pinn ghorma	obair na ngaibhne dubha
na sparáin theanna	seirbhísí na leabharlann poiblí

4.3 Díochlaonadh na hAidiachta

4.3.1

Is ionann foirm don aidiacht sa tuiseal ainmneach, sa tuiseal cuspóireach agus sa tuiseal tabharthach uatha, agus is ionann foirm don aidiacht sa tuiseal ainmneach, sa tuiseal cuspóireach agus sa tuiseal tabharthach iolra.

4.3.2

Sa tuiseal ginideach iolra —

más tréaniolra atá ag an ainmfhocal, úsáidtear an fhoirm chéanna den aidiacht a úsáidtear sa tuiseal ainmneach iolra:

Ainmneach iolra

Is maith liom na filí móra.

Ginideach iolra

Is maith liom dánta na bhfilí móra.
más lagiolra atá ag an ainmfhocal, úsáidtear an fhoirm chéanna den aidiacht a úsáidtear sa tuiseal ainmneach uatha:

Ainmneach uatha

Foilsíonn an t‑údarás áitiúil tuarascáil gach bliain.

Ginideach iolra

Foilsíodh tuarascálacha na n‑údarás áitiúil.

4.3.3

Ní shéimhítear ná ní infhilltear aidiacht sa ghairmeach firinscneach más ainm ceana nó brí mheafarach atá i gceist.

Cén chaoi a bhfuil tú, a athair beag?

A dheartháir dílis, bhí a fhios agam go maith gur tú a bhí ann.

A bhéal cumhra, nach muid a bheidh sásta le chéile.

Conas atá tú, a mhac bán?

Séimhítear túslitir na haidiachta, áfach, más ainmfhocal baininscneach atá roimpi.

Cad é mar atá tú inniu, a thaisce mhilis?

A mháthair bheag, ní bheidh deireadh go deo le do chuid oibre.

4.3.4

Ní infhilltear an aidiacht i ndiaidh ainmneacha baiste ban, e.g., Máire Mhór, teach Mháire Mhór.

4.3.5

Ní infhilltear an aidiacht ná ní dhéantar athrú tosaigh uirthi ar lorg dobhriathra nó aidiachtaí a úsáidtear mar dhobhriathra amhail cuibheasach, sách, measartha, réasúnta, etc.

Is bean measartha saibhir í.

Mná measartha saibhir is ea iad.

Fir sách ard is ea iad.

Páistí réasúnta ciúin is ea iad.

Maidin sách fuar a bhí ann.

Bliain cuibheasach tirim atá uainn.

4.3.6

Ní infhilltear an aidiacht ar lorg na míre treise an-.

Is daoine an-bhreá iad.

Déanfar na gnéithe an-tábhachtach sin a mheas.

Ní páistí an-chiúin iad.

4.3.7

Ní infhilltear an aidiacht ná ní chuirtear séimhiú uirthi más cuid de fhrása aidiachtach ilfhoclach í, e.g., athnuachan saor in aisce; tuarascáil cothrom le dáta.

Is bean mór le rá í i réimse na heolaíochta.

Ba é údar na tuarascála cothrom le dáta a thug an cur i láthair.

4.3.8

Is faoi gach díochlaonadh ar leithligh a thugtar cur síos ar fhoirm an ghinidigh uatha.

4.4 An Chéad Díochlaonadh

Cuimsítear sa díochlaonadh seo aidiachtaí a chríochnaíonn ar chonsan, leathan nó caol, seachas aidiachtaí a chríochnaíonn ar -úil agus roinnt aidiachtaí a chríochnaíonn ar -ir (féach 4.5).

4.4.1 Foirm an Ghinidigh Uatha

Firinscneach
1. Más consan leathan is críoch don aidiacht, caolaítear an consan mar a dhéantar le hainmfhocail sa Chéad Díochlaonadh (féach 2.2.2).
  
  Cár fhág sé hata an fhir mhóir?
  
  Caithfear coinníollacha an chonartha bhuain a léamh go cúramach.
  
  Léigh sé leabhar an imreora chlúitigh nuair a foilsíodh é.
2. Ní dhéantar infhilleadh sa ghinideach uatha firinscneach ar aidiachtaí aonsiollacha a chríochnaíonn ar -ch(t) (ach amháin bocht), e.g., beacht, caoch, déach, fliuch, lách, moch, nocht.
  
  Bhí orthu an fhéile a chur ar siúl ag deireadh an tsamhraidh fhliuch.
  
  Tá na páistí i rang an mhúinteora bheacht i mbliana.
  
  Goideadh ba an fheirmeora bhoicht.
3. Más consan caol nó -íoch is críoch don aidiacht, ní dhéantar infhilleadh uirthi.
  
  Ba mhaith liom labhairt le tuismitheoirí an bhuachalla chiúin.
  
  Bhí gach duine i bhfabhar an fheachtais thionsclaíoch.
4. Ní dhéantar infhilleadh sa ghinideach uatha firinscneach ar aidiachtaí aonsiollacha a chríochnaíonn ar chonsan dúbailte (ach amháin dall, donn, fionn), e.g., cearr, corr, gann, gearr, mall, teann, toll.
  
  Tá praghas an bhia ghann ag ardú gach lá.
  
  Chuir costas an turais ghearr iontas orthu.
  
  Bhí boladh an aráin dhoinn ar fud an tí.
5. Ní dhéantar infhilleadh sa ghinideach uatha firinscneach ar na haidiachtaí aonsiollacha seo a leanas: amh, cúng, deas (sa bhrí cineálta), leamh, mear, seang, searbh, tearc, tiubh, trom, tur.
  
  Chuir sí ola ar dhoras an bhealaigh chúng.
  
  Labhair mé le húinéir an chapaill mhear.
Baininscneach
1. Cuirtear -e leis an gconsan deiridh, agus caolaítear é más leathan dó, e.g., gorm, goirme; maith, maithe mar a dhéantar le hainmfhocail sa Dara Díochlaonadh (féach 2.3.2)).
  
  Féach ar áilleacht na spéire goirme.
  
  Cé hé údar na tuarascála maithe?
2. I gcás aidiachtaí a chríochnaíonn ar -(e)ach, cuirtear -(a)í in ionad -(e)ach, e.g., isteach, aistí; iontach, iontaí; mar a dhéantar le hainmfhocail sa Dara Díochlaonadh (féach 2.3.2)).
  
  Tá guth na caillí aistí le cloisteáil ar an taifead.
  
  Thaitin téama na haiste iontaí liom.
3. I gcás aidiachtaí a chríochnaíonn ar -íoch, athraítear -íoch go -íche, e.g., eacnamaíoch, eacnamaíche.
  
  Cathain a bhraithfimid deireadh na géarchéime eacnamaíche?
  
  Is maith an rud é fás na hearnála tionsclaíche.
4. Féach Caibidil 2 don chur síos cuimsitheach ar athrú gutaí.

4.4.2 Foirm an Ghairmigh Uatha

Is ionann foirm don ghairmeach uatha agus don ainmneach uatha, ach amháin i gcás aidiachtaí a gcaolaítear a gconsan deiridh sa ghinideach uatha firinscneach. I gcás na n‑aidiachtaí sin, is gnách gurb ionann foirm an ghairmigh uatha fhirinscnigh agus foirm an ghinidigh uatha fhirinscnigh, e.g., a fhir mhóir; cóta an fhir mhóir.

4.4.3 Foirm an Iolra — Gach Tuiseal

Cuirtear -a leis na haidiachtaí a chríochnaíonn ar chonsan leathan agus -e leis na haidiachtaí a chríochnaíonn ar chonsan caol agus coimrítear aidiachtaí áirithe (ach féach lagiolraí sa ghinideach iolra, 4.3.2(b)).

Cá bhfuil na peileadóirí clúiteacha?

Foilseofar na haistí maithe san iris bhliantúil.

Bhí na daoine uaisle i láthair inné.

4.4.4 Coimriú san Uatha agus san Iolra

Déantar coimriú sa tuiseal ginideach uatha baininscneach agus san uimhir iolra i ngach tuiseal ar na haidiachtaí sa tábla seo a leanas, i measc eile, ach ní choimrítear na foirmeacha idir lúibíní.

**Tábla 4C** Coimriú san Uatha agus san Iolra
Ainmneach Uatha	Ginideach Uatha Baininscneach	Iolra
álainn	áille	áille
aoibhinn	aoibhne	aoibhne
bodhar	(bodhaire)	bodhra
daibhir	daibhre	daibhre
daingean	daingne	daingne
deimhin	deimhne	deimhne
dílis	dílse	dílse
doilbhir	doilbhre	doilbhre
domhain	doimhne	doimhne
folamh	foilmhe	folmha
íseal	ísle	ísle
láidir	láidre	láidre
milis	milse	milse
ramhar	raimhre	ramhra
righin	righne	righne
saibhir	saibhre	saibhre
sleamhain	(sleamhaine)	sleamhna
soilbhir	soilbhre	soilbhre
uasal	uaisle	uaisle

4.5 An Dara Díochlaonadh

Cuimsítear sa díochlaonadh seo aidiachtaí a chríochnaíonn ar -úil, mar aon le roinnt aidiachtaí a chríochnaíonn ar -ir, e.g., óir, deacair, socair.

4.5.1 Foirm an Ghinidigh Uatha

Firinscneach

Ní théann aon infhilleadh ar aidiachtaí an díochlaonta seo.

Cá bhfuil athair an fhir chóir?

Léigh mé tús an leabhair shuimiúil.
Baininscneach

Leathnaítear an consan deiridh agus cuirtear -a leis.

Cá bhfuil athair na mná cáiliúla?

Léigh mé tús na haiste deacra.

4.5.2 Foirm an Iolra — Gach Tuiseal

Leathnaítear an consan deiridh agus cuirtear -a leis mar a dhéantar sa ghinideach uatha baininscneach (ach féach lagiolraí sa ghinideach iolra, 4.3.2(b)).

Cá bhfuil na fir cháiliúla agus na mná dathúla?

Léigh mé na dánta suimiúla inné.
Coimrítear deacair, deacra; socair, socra sa ghinideach uatha agus san uimhir iolra.

4.6 An Tríú Díochlaonadh

4.6.1

Cuimsítear sa díochlaonadh seo aidiachtaí a chríochnaíonn ar ghuta, e.g., cliste, cróga.

4.6.2

Ní dhéantar infhilleadh ach ar dhá aidiacht sa díochlaonadh seo: breá agus te. Athraíonn breá go breátha sa ghinideach uatha baininscneach agus san uimhir iolra agus athraíonn te go teo san uimhir iolra (ach féach lagiolraí sa ghinideach iolra, 4.3.2(b)).

Ainmneach uatha

Tine bhreá the a bhí ann.

Ginideach uatha

Dath na tine breátha te.

Ainmneach iolra

Lasadh na tinte breátha teo.

4.7 Achoimre ar Dhíochlaontaí na nAidiachtaí

**Tábla 4D** Achoimre ar Dhíochlaontaí na hAidiachta — Firinscneach Uatha
Ainmfhocal Firinscneach Uatha
Tuiseal	An Chéad Díochlaonadh	An Dara Díochlaonadh	An Triú Díochlaonadh
Ainmneach	an fear beag	an fear misniúil	an cóta buí
	an peileadóir clúiteach	an duine cóir	an garda cróga
	an buachaill ciúin	an t‑óstóir flaithiúil	an duine cuí
Gairmeach	a fhir bhig	a fhir mhisniúil	a gharda chróga
	a pheileadóir chlúiteach	a dhuine chóir	a dhuine chuí
	a bhuachaill chiúin	a t‑óstóir fhlaithiúil	a fhear chliste
Tabharthach*	ag an bhfear beag	don fhear misniúil	ar an gcóta buí
	don pheileadóir clúiteach	chuig an duine cóir	ag an ngarda cróga
	leis an mbuachaill ciúin	ón óstóir flaithiúil	leis an duine cuí
Ginideach	caipín an fhir bhig	eachtra an fhir mhisniúil	úinéir an chóta bhuí
	ainm an pheileadóra chlúitigh	clann an duine chóir	thar ceann an duine chuí
	rang an bhuachalla chiúin	comhairle an óstóra fhlaithiúil	guth an gharda chróga

*Ach féach 1.7 Córas an tSéimhithe

**Tábla 4E** Achoimre ar Dhíochlaontaí na hAidiachta — Baininscneach Uatha
Ainmfhocal Baininscneach Uatha
Tuiseal	An Chéad Díochlaonadh	An Dara Díochlaonadh	An Triú Díochlaonadh
Ainmneach	an bhean bheag	an bhean ghairmiúil	an éide ghalánta
	an bhó álainn	an tuairisc mhíosúil	an aiste ghonta
	an mháthair imníoch	an aiste dheacair	an mhí fhada
Gairmeach	a bhean bheag	a bhean ghairmiúil	a bhean chróga
	a aintín álainn	a aintín fhlaithiúil	a aintín ghalánta
	a mháthair imníoch	a mháthair chóir	a mháthair chróga
Tabharthach	don bhean bheag	don bhean ghairmiúil	ar an éide ghalánta
	ag an aintín álainn	sa tuairisc mhíosúil	san aiste ghonta
	leis an máthair imníoch	san aiste dheacair	den mhí fhada
Ginideach	teach na mná bige	maoin na mná gairmiúla	luach na héide galánta
	peata na máthar imníche	fad na tuairisce míosúla	údar na haiste gonta
	ceol na haintín áille	teideal na haiste deacra	deireadh na míosa fada

**Tábla 4F** Achoimre ar Dhíochlaontaí na hAidiachta — Firinscneach Iolra
Ainmfhocal Firinscneach Iolra
Tuiseal	An Chéad Díochlaonadh	An Dara Díochlaonadh	An Triú Díochlaonadh
Ainmneach	na fir bheaga	na leabhair shuimiúla	na cótaí buí
	na peileadóirí clúiteacha	na daoine córa	na daoine cuí
	na buachaillí ciúine	na páistí flaithiúla	na gardaí cróga
Gairmeach	a fheara beaga	a fheara misniúla	a dhaoine cuí
	a pheileadóirí clúiteacha	a dhaoine córa	a fheara cliste
	a bhuachaillí ciúine	a pháistí flaithiúla	a ghardaí cróga
Tabharthach	ar na fir bheaga	do na fir mhisniúla	ar na cótaí buí
	na peileadóirí clúiteacha	leis na daoine córa	leis na daoine cuí
	leis na buachaillí ciúine	ó na páistí flaithiúla	do na gardaí cróga
Ginideach	caipíní na bhfear beag	bás na bhfear misniúil	úinéirí na gcótaí buí
	bróga na bpeileadóirí clúiteacha	clann na ndaoine córa	ar son na ndaoine cuí
	rang na mbuachaillí ciúine	airgead na bpáistí flaithiúla	hataí na ngardaí cróga

**Tábla 4G** Achoimre ar Dhíochlaontaí na hAidiachta — Baininscneach Iolra
Ainmfhocal Baininscneach Iolra
Tuiseal	An Chéad Díochlaonadh	An Dara Díochlaonadh	An Triú Díochlaonadh
Ainmneach	na mná beaga	na mná gairmiúla	na héidí galánta
	na haintíní áille	na haintíní córa	na haistí gonta
	na máithreacha imníocha	na hiníonacha flaithiúla	na míonna fada
Gairmeach	a mhná beaga	a mhná gairmiúla	a mhná galánta
	a aintíní áille	a aintíní córa	a iníonacha cróga
	a mháithreacha imníocha	a iníonacha flaithiúla	a aintíní cliste
Tabharthach	do na mná beaga	do na mná gairmiúla	leis na héidí galánta
	ag na haintíní áille	leis na haintíní córa	sna haistí gonta
	leis na máithreacha imníocha	ó na hiníonacha flaithiúla	de na míonna fada
Ginideach	teach na mban beag	pá na mban gairmiúil	luach na n‑éidí galánta
	ceol na n‑aintíní áille	clann na n‑aintíní córa	údair na n‑aistí gonta
	deifir na máithreacha imníocha	airgead na n‑iníonacha flaithiúla	tús na míonna fada

4.8 Céimeanna Comparáide na hAidiachta

4.8.1

Is gnách gurb ionann foirm do bhreischéim agus do shárchéim aidiachta agus don ghinideach uatha baininscneach, e.g., ard, airde; breá, breátha; cóir, córa; dathúil, dathúla; deacair, deacra; díreach, dírí.

Faigh an luach is airde air.

Is í Ciara an cailín is dathúla sa rang.

An rud is deacra faoin bhfilíocht, a léamh mar is cóir.
Is ionann freisin foirm do bhreischéim agus do shárchéim aidiachta agus don ghinideach uatha baininscneach i gcás aidiachtaí a chríochnaíonn ar -íoch, e.g., buíoch, buíche; débhríoch, débhríche; imníoch, imníche; impíoch, impíche; taithíoch, taithíche; uathoibríoch, uathoibríche.

Is iadsan na daoine is imníche sa tír.

Is eisean is taithíche ar an obair seo.

Cuirfear an córas is uathoibríche i bhfeidhm.

4.8.2

Tá foirmeacha neamhrialta ar roinnt aidiachtaí, e.g., beag, lú; dócha, dóichí; fada, faide (sia); fogas, foisce; furasta, fusa; gearr, giorra; iomaí, lia; maith, fearr; mór, mó; olc, measa; te, teo.

Is é Rónán an duine is fearr sa rang.

Is í an chuimhne is faide (is sia) siar i mo cheann í.

Cé acu ceann is mó?

4.8.3 Foirmeacha ar lorg dá agus a

I ndiaidh dá agus a, is cuma feidhm réamhthagrach nó feidhm iarthagrach a bheith acu, is gnách go n‑úsáidtear foirm is ionann agus foirm na breischéime den aidiacht nó foirm a dhíorthaíonn ón mbreischéim nó ón mbunchéim agus a chríochnaíonn ar -cht.
Ní úsáidtear ach foirm amháin i gcás na n‑aidiachtaí seo a leanas: dócha, dóichí; dona, donacht; furasta, fusacht; gearr, giorracht; agus i gcás na leaganacha neamhrialta seo: beag, laghad; fada, fad; iomaí, liacht; maith, feabhas; mór, méad/méid; olc, olcas; tiubh, tiús.
Úsáidtear méid seachas méad i gcásanna áirithe, e.g., dá mhéad airgead a bhí aici ach a mhéid is indéanta le réasún; a mhéid is gá.

B’aoibhinn liom a áille (a bhinne, a chruinne, a líofa, a réidhe, a shoiléire) a labhair sí.

Ní chreidfeá a achrannaí (a dhonacht, a olcas, a shleamhaine, a uaigní) a bhí an áit.

Fuair sé ardmholadh trína fheabhas a rinne sé an obair.

Dá chríonna (dá chróga, dá fheabhas, dá ghlice, dá oilte) é, níor éirigh an gnó leis.

Dá dhonacht (dá ghránna, dá leisciúla, dá olcas, dá shuaraí) é, caithfear glacadh leis.

Dá mhéad dúil a bhí aici ann, níor cheannaigh sí sa deireadh é.

4.9 An Aidiacht Shealbhach

De bhrí go bhfeidhmíonn na haidiachtaí sealbhacha, mo, do, a (firinscneach agus baininscneach uatha), ár, bhur agus a (iolra) mar fhorainmneacha sa ghinideach, déantar trácht orthu i gCaibidil 8.

4.10 An Aidiacht Thaispeántach

Is iad seo, sin, siúd agus úd na haidiachtaí taispeántacha. (Cé gur forainmnigh thaispeántacha iad seo, sin agus siúd, is minic a dhéantar tagairt dóibh mar aidiachtaí taispeántacha.)

Tá an fear seo tinn.

Beidh an buachaill seo ag teacht liom.

Is liomsa iad seo.

Níl an doras sin dúnta.

Síle is ainm don chailín sin.

Díoladh a theach siúd inné.

Is aige siúd a bhí an t‑airgead.

An bhfeiceann tú an pháirc úd thall?

4.11 An Aidiacht Fhaisnéiseach

Is aidiacht fhaisnéiseach aidiacht atá ag cáiliú an ainmní mar fhaisnéis nó mar chuid den fhaisnéis, e.g., Nach deas é?; Tá an aimsir fuar. Ní dhéantar an aidiacht fhaisnéiseach a infhilleadh ná ní chuirtear séimhiú uirthi.

Bhí an traein folamh.

Bíonn na busanna déanach.

An bhfuil an bhean sin saibhir?

Beidh an bhainis sin mór.

4.12 An Aidiacht Bhriathartha

4.12.1

Feidhmíonn an aidiacht bhriathartha mar ghnáthaidiacht. Úsáidtear an aidiacht bhriathartha —

mar aidiacht cháilíochta, e.g., Is bean phósta í;
mar aidiacht fhaisnéiseach ar lorg na copaile, e.g., Ní briste atá sé;
mar aidiacht fhaisnéiseach ar lorg an bhriathair bí ag léiriú staid an chuspóra tar éis an ghnímh, e.g., Is í atá tugtha don obair;
mar aidiacht fhaisnéiseach ar lorg an bhriathair bí ag léiriú staid an ghníomhaí tar éis an ghnímh, e.g., Táimid beirthe go maith leis an socrú sin.

Caibidil 4 | An Aidiacht